UDHËZIME PËR DORËZIMIN E ABSTRAKTEVE

1. Abstrakti duhet të dorëzohet vetëm duke përdorur modelin e aprovuar, të cilin mund ta shkarkoni më poshtë. Abstraktet që dorëzohen jashtë këtij formati nuk do të merren në shqyrtim.

2. Për profesionistët shqiptarë, abstrakti duhet të dorëzohet vetëm në gjuhën shqipe.

3. Titulli i abstraktit duhet të jetë i përmbledhur, pa përdorim shkurtesash apo inicialesh.

4. Pas titullit, duhet të renditen emrat e të gjithë autorëve, së bashku me afilacionet e tyre institucionale. Autori i parë i renditur do të konsiderohet si prezantuesi i punimit në Kongres.

5. Autorët kërkohen të respektojnë rregullat e drejtshkrimit dhe gramatikës.

6. Teksti i abstraktit duhet të jetë nga 250 deri në 300 fjalë. Ky numër nuk përfshin titullin, emrat e autorëve dhe afilacionet. Abstraktet që tejkalojnë këtë limit nuk do të pranohen.

7. Abstrakti duhet të përmbajë vetëm të dhëna origjinale. Ndarja e të dhënave nga i njëjti studim në disa abstrakte ose tema të ndryshme nuk lejohet dhe do të çojë në refuzimin e tyre automatik.

8. Emrat tregtarë ose markat komerciale nuk lejohen në përmbajtjen e abstraktit. Substancat duhet të përmenden sipas emërtimit të tyre shkencor, në përputhje me standardet ndërkombëtare të publikimeve.

9. Deklarimi i konfliktit të interesit është i detyrueshëm. Qëllimi i Kongresit është të ofrojë sesione me vlerë edukative dhe pa ndikim komercial. Autori prezantues dhe të gjithë bashkautorët duhet të deklarojnë çdo konflikt të mundshëm interesi në momentin e dorëzimit të abstraktit, duke plotësuar formatin e deklaratës së konfliktit të interesit, të cilën e shkarkoni më poshtë.

10. Abstrakti duhet të përfshijë referenca të besueshme, nga të cilat të paktën tre duhet të jenë të publikuara brenda pesë viteve të fundit.

11. Dokumentat duhen ngarkuar në format Word ose PDF, me emrin e autorit prezantues si emërtim i skedarit. Ju lutemi mos përfshini karaktere speciale në emërtim.

12. Të gjitha abstraktet e pranuara do të publikohen në libër abstraktesh me numër ISBN zyrtar.

13. Për lektorët, përfshihet një punim pa pagesë. Për çdo punim shtesë të pranuar (prezantim oral ose E-Poster) aplikohet një tarifë prej 5,000 ALL për punim.

14. Për E-posters, pas aprovimit të abstraktit, aplikohet një tarifë pjesëmarrjeje prej 5,000 ALL për e-poster. 

15. Përdorimi i mjeteve të inteligjencës artificiale lejohet vetëm për asistencë gjuhësore, redaktim ose përmirësim të strukturës së tekstit. Inteligjenca artificiale nuk mund të deklarohet si autore e punimit. Autorët mbajnë përgjegjësi të plotë për origjinalitetin, saktësinë shkencore dhe integritetin e abstraktit. Përdorimi i AI për gjenerimin e të dhënave, analizave ose referencave të pavërteta nuk lejohet.